जु डांडा कबि गीत लान्दा था
आज सि द्यै लगान्दी रैगे
जु चाँटा कबि मन हरि लेन्दा था
आज अप्पु हि हरयां रैगे
क्य ह्वै म्यरा पहाड़ त्वै क्या ह्वैगे
जींक कबि फूलों कि घाटी बोल्दा था
आज वख कांडों का बगवान ह्वैगे
जींक सब्बि द्यबतों भूमि बोल्दा छा
आज स्य भूमि समलोणया रैगे
क्य ह्वै म्यरा पहाड़ त्वै क्या ह्वैगे
जड़ी बुटि जख खजाणु बतोन्दा था
आज उ सारू खजाणु घाम लैगे
चौरासी जुग्गों जख उत्थान बतोन्दा था
भरुषु आज ये जुगा कु नि रैगे
क्य ह्वै म्यरा पहाड़ त्वै क्या ह्वैगे
बीर भाढ़ो कु जख देस बोल्दा था
आज वे देस छूड़ी परदेस नैगे
जख कबि बीरू मा बीर होन्दा था
आज स्यु सारु मुल्क रितु ह्वैगे
क्य ह्वै म्यरा पहाड़ त्वै क्या ह्वैगे
जख कबि द्यबतों बास होन्दु थो
आज वख मनख्यूं पर बास एैगे
जख कबि पंडों की थात होंदी थै
आज वख कोरों कु राज छैगे
क्य ह्वै म्यरा पहाड़ त्वै क्या ह्वैगे
जख कबि थोळा मेळा होन्दा था
आज वख रोळा ही रोळा छैगे
जख कबी बार तिवार मनोन्दा था
आज वख दारु हि तिवार रैगे
क्य ह्वै म्यरा पहाड़ त्वै क्या ह्वैगे
जख कबि चाँटों मा ह्युं रंदु थो
आज सि चाँटा घामन फुकैगे
जख धारों मा ठंडो पाणी रंदु थो
आज सी धारा भि सफ्फा सुकिगे
क्य ह्वै म्यरा पहाड़ त्वै क्या ह्वैगे
प्रभात सेमवाल (अजाण )सर्वाधिकार सुरक्षित
