सात समोदर पार
औन्दु बाडुलि मा रैबार
बोड़ी ऐजा झठ बोड़ी
बोड़िक तें घोर
राजी खुशी भैजी देन्द
गौं गळाकि म्यरा
दूर देस राजी रै तु
ओंद जांदा फ्यरा
सदानि भंरया रो त्यरा
भाग का कुठार
सात समोदर पार
औन्दु बाडुलि मा रैबार
त्वै बिना सुन्नु लगदु
सारू घोर बोण
वनि चौमास लग्युं अबारी
बरख्याउ सोण
त्यरा बिगर सुक्खि लगणी
हरी भरी सार
सात समोदर पार
औन्दु बाडुलि मा रैबार
घुघती बासणी डाली
खुद लगणी भारी
डाइयों खिल्यां फुलों द्याखि
याद ओणी त्यारी
त्यरा बिगर जरा नि रयुं
मन मा उलार
सात समोदर पार
औन्दु बाडुलि मा रैबार
होंदा जू पंखुड़ म्यरा
उड़ी ओंदु अगास
खैरी मन की सुणै देंद
बंधिक तें आस
बोलि देंद मन की बात
निकाई मन की डार
सात समोदर पार
औन्दु बाडुलि मा रैबार
क्वांसु पराण तिसाळु मन
बैठ्यों छ उदास
कब आलु बोड़िक तेन
कैन द्यण सास
बंधिक नि बधिन्दि धीर
द्याखि फुलों फुलार
सात समोदर पार
औन्दु बाडुलि मा रैबार
दिन रात मन बस
त्यारी छ जाग
त्वै बिगर म्यरा पराणी
अधुरु छ राग
अबत त्यारी खुद छ म्यरा
ज्यूणा कु अधार
सात समोदर पार
औन्दु बाडुलि मा रैबार
प्रभात सेमवाल (अजाण )सर्वाधिकार सुरक्षित
