कभि त रात ब्यांली होलि सुबेर !
कभि त खुललि म्यरी खैरि कि गेड़ !!
कटेला एक दिन ई घैणा अँधेरा !
कभि त उजाळु आलो यख फेर !!
साक्यो पुराणी बादलों मा " जोन "!
कभि त ऐ जाली बौड़ीकि भैर !!
बसग्याळ जालू बीती यु गैल्या !
कभि त बणलू मै बसंत मा ग्वेर !!
घुघूती बासालि मनमा कभि मेरा !
कभित आलो बौड़ी स्यो बग्त फेर !!
सुपिन्याँ मेरा सुपिन्याँ सच ह्वेकि राला !
कभि त बिजालू यों सुपिन्यों तैं मैर !!
होला ई द्यो-देवता मेरा कबि दैणा !
कभि त सजलि मेरा भागै मुंडेर.......!!
प्रभात सेमवाल ( अजाण ) सर्वाधिकार सुरक्षित
