कु लिजालु मीरु रैबार
यों डाड्यों का पार
कु भग्यान हुलु यन
जू जालु म्यरा घोर
कु बांधलु निरास ब्वै बाबू तें
थ्वड़ा मीरी आस
कु द्यालु ऊंकी जिकुड़ी तें
थ्वड़ा सी बिसवास
कु जी बोललू गैल्या मा
मीरी जिकुड़ी कु प्यार
कु समझालु वे तें इन
नि कन मन उदास
कु बिंगालु भै बैणियों मा
म्यरा मन की बात
कु समझालु औंते यन
कि मिली रैण साथ
कु लिजालु गौं गळा मा
राजी खुशी म्यार
कु बतालु दौड़या दगड़ियों
म्यरा मन कु उलार
प्रभात सेमवाल (अजाण )सर्वाधिकार सुरक्षित
