म्यारु यु पहाड़

बारा मैनों बारा मास
ह्यूंद जाडु चौमास
कतगा खुश मिजाज
म्यारु यु पहाड़

ओंदी जब बसंती बहार
ल्यै दीन्दी चोदिसों फुलार
कन ये मन तें रिझोन्दि
औन्दु भारी उलार

चलदी ठंडी हवा सरसर
उड़ोन्दी यों डळियों फरफर
नै उमंग बांटी दीन्दी
यों खाळ धार

जब लगदी बरखा की झड़ी
काठ्यों भी ह्यून औन्दु पड़ी
आँखि द्याखदी रैन्दी खड़ी
तै ऊँचा हिवाँल

चौमासी जब दिन बौड़द
गाड़ गद्न्या सब्बी पौजद
काखुड़ी मुंगरी लगी जांद
म्यरा गौं गुठ्यार

बोड़ी ओन्दा थोळा मेळा
सब्बी जान्दा गौ खोळा
जख द्याखा रोळा रोळा
स्यु कनु भलु रिवाज

बोड़ी ओंदी यगास बग्वाळ
ऐ जांदा सब्बी घार
हिली मिली मनोंदा गैल
सब्बी बार त्यौहार

प्रभात सेमवाल (अजाण )सर्वाधिकार सुरक्षित