रैबार

आयुं छः आयुं घोर बिटि मैकरैबार
झठ ओधु बौड़िक तु ऐजा झठ घार

ब्वै बाबू निरास ह्वेकि द्यणा मैक रैबार
झठ ऐजा बिसरी गै हम तीरी अनवार

भै भुला भी ब्वना म्यरा खुद लगीं छ भारी
बंडी बर्ष बीति गै नि द्याखी अनवार तुमारी

दगड़ा का दगड़िया हुयां भारी लाचार
ब्वना कख हर्ची गै त्यरा सी पहाड़ी विचार

फूल डाई त्वै खोजणी खोज्णु गौं गुठ्यार
फोनु पंछी मा त्यरा बिगर नि दिखेंणु उलार

गौं गळा भी ब्वना किलै छोड़ी हम आज
कख गै सी त्यरा खाँया-करयां सौं करार

कै निर्दै निठुर ह्वै तु किलै नि करदु याद
क्या यतगा झठ बिसरी गै उ दिन बार

सारा लग्यां त्यरा सब बांधिक आस
ऐजा बौड़िक बुलोणु त्वै सेरु गौं गुठ्यार

     प्रभात सेमवाल (अजाण )सर्वाधिकार सुरक्षित